OʼZ  ЎЗ  РУ  EN

Abdulla Qodiriy. «Ko‘mak» uyushmasiga ionalar (1923)

Keyingi kunlarda «Ko‘mak» uyushmasiga[1] berilgan ionalarning hisobi juda ham ko‘payib ketdi. Tushkan ionalarni[2] uyushmaning bitta kassasi eplay olmag‘anliqdan ikkinchi kassa ochmoqqa majbur bo‘lindi. Keyingi oyda iona bergan saxiylarning ro‘yxati mundaydir:

  1. Valihoji — besh milliard so‘mga arziyturg‘an duo.
  2. G‘ulomshayx boybachcha — «O‘qushg‘a ketkan yigitlar mullo bo‘lsunlar» degan yaxshi tilak (baho qo‘yish komissiyasining so‘ziga qarag‘anda bu iona ham 5 milliardg‘a arzir ekan).
  3. Azimboybachcha ko‘mirchi — sakkiz put toshko‘mir,
  4. «Tujjor» shirkati — ikkita solol tovoq bilan bitta xurmacha.
  5. «Qamar» shirkati — chorak qadoq olma choy.
  6. Poyafzal bozoridag‘i do‘kondorlar o‘zaro — bir poy bachkana etik[3].
  7. Chit bozorining do‘kondorlaridan — bir gazu uch chorak gazlama.
  8. Attor og‘a-inilardan — ikki quti upa.
  9. Qassobliqdan — besh dona o‘pka.
  10. Qandolatchilardan — uch istakan pistashka bilan bir qadoq pashmak va boshqalar.

Ushbulardan Berlin o‘qug‘uchilarimizg‘a yuborildi:

Berlin talabalarimiz ortuqcha muhtoj bo‘lg‘anliqlaridan birinchi galda to‘rt put toshko‘mir, ikkita sopol tovoq, bir posilka duo yuborildi.

Muxbir: Dumbul.

«Mushtum»: Oltun olma, duo ol — duo oltun emasmi?

«Mushtum» — 1923 yil, 4-son, 6-bet

 

[1]«Ko‘mak» uyushmasi — 1921 yilda Turkistondan chet elga, masalai, Germaniyaga borib o‘qish harakatn boshlanadi. «O‘zbek bilim hay’ati» va «Ko‘mak» uyushmasining yordami bilan 1923-1924 yillar davomida Turkiston va Buxorodan 58 ta talaba Germaniyaningturli o‘quv yurtlariga borib o‘qiganlar. «Ko‘mak» uyushmasi bu talabalarga moddiy yordam yuborib turgan. Afsuski, bu talabalarning o‘qishini bitirib vataniga qaytganlari 30-yillar qurboni bo‘lgan.

[2]Iona — moddiy yordam, nafaqa.

[3]Bachkana etik — bolalar etigi.

Saytimiz rivojiga hissa

Uzcard: 8600 5504 8563 9786

© 2004-2020 - Ziyo istagan qalblar uchun! Saytda taqdim etilgan elektron manbalardan faqatgina shaxsiy mutolaa maqsadida foydalanish mumkin. Tijoriy maqsadlarda foydalanish (sotish, chop etish, ko‘paytirish, tarqatish) qonunan taqiqlanadi. Saytdan materiallar olib chop etilganda manzilimiz koʻrsatilishi shart.